ໃນວັນທີ 25 ພຶດສະພາ 2023 ການເຊັນບົດບັນທຶກຄວາມເຂົ້າໃຈ (MOU) ລະຫວ້່ງ ສະຖາບັນອຸດສາຫະກໍາ ແລະ ການຄ້າ (ສອຄ – IIC) ແລະສະຖາບັນວິໄຈ ແລະ ພັດທະນາເສດຖະກິດການຄ້າ (IBERD)

ການເຊັນບົດບັນທຶກຄວາມເຂົ້າໃຈ (MOU) ກ່ຽວກັບ ການຫັນເປັນດິຈິຕອນ ແລະ ການແກ້ໄຂບັນຫາຂອງທຸລະກິດ ລະຫວ່າງ ສະຖາບັນອຸດສາຫະກໍາ ແລະ ການຄ້າ ແລະ ສະຖາບັນ ສະຖາບັນວິໄຈ ແລະ ພັດທະນາເສດຖະກິດການຄ້າ (IBERD) ໃນວັນທີ 25 ພຶດສະພາ 2023 ທີ່ ສະຖານເອກອັກຄະລັດຖະທູດລາວ ປະຈໍາບາງກອກ, ປະເທດໄທ.

ຝ່າຍ ສປປ ລາວ: ນຳໂດຍ ທ່ານ ວຽງສະຫວ່າງ ທິບພະວົງ, ຮອງຫົວໜ້າສະຖາບັນ ສອຄ ຕາງໜ້າຝ່າຍລາວ ຮ່ວມເຊັນ MOU ພ້ອມດ້ວຍຄະນະພະນັກງານຂອງ ກະຊວງ ອຄ ແລະ ຄະນະຈາກສະຖານເອກອັກຄະລັດຖະທູດລາວ ປະຈໍາບາງກອກ.

ຝ່າຍ ໄທ : ນຳໂດຍ ທ່ານ ນາງ ນາຕີ ສວນສະນີດ, ຜູ້ບໍລິຫານໃຫຍ່ ຂອງສະຖາບັນວິໄຈ ແລະ ພັດທະນາເສດຖະກິດການຄ້າ (IBERD) ພ້ອມດ້ວຍຄະນະພະນັກງານ ຂອງ IBERD, ປະເທດໄທ.

ສະຖາບັນອຸດສາຫະກໍາ ແລະ ການຄ້າ (ສອຄ – IIC), ກະຊວງອຸດສາຫະກໍາ ແລະ ການຄ້າ ຮັບຜິດຊອບການຄົ້ນຄວ້າ, ສະໜອງການຝຶກອົບຮົມ, ພັດທະນານະໂຍບາຍ ແລະ ຍຸດທະສາດທີ່ກ່ຽວຂ້ອງເຖິງອຸດສາຫະກຳ ແລະ ການຄ້າ ຢູ່ ສປປ ລາວ.

ສະຖາບັນວິໄຈ ແລະ ພັດທະນາເສດຖະກິດການຄ້າ (IBERD) ເປັນສະຖາບັນທີ່ໃຫ້ບໍລິການກ່ຽວກັບການວິໄຈນະວັດຕະກໍາ ໃນຂະແໜງການຕ່າງໆ ເຊັ່ນ: ດ້ານອຸດສາຫະກໍາ, ການຈັດຝຶກອົບຮົມໃນຫົວຂໍ້ຕ່າງໆ ທີ່ຕິດພັນກັບວຽກງານດ້ານເສດຖະກິດ-ການຄ້າ, ການຄ້າທາງອີເລັກໂຕຣນິກ ແລະ ນະວັດຕະກໍາ ເພື່ອນໍາໄປສູ່ການຕໍ່ຍອດທາງທຸລະກິດ-ການຄ້າ ໂດຍສະເພາະແມ່ນການຈັດຝຶກອົບຮົມຜ່ານລະບົບອີເລັກໂຕຣນິກ.

ທັງສອງສະຖາບັນ ໄດ້ວາງແຜນຮ່ວມມືໃນອະນາຄົດ ກ່ຽວກັບການຄົ້ນຄວ້າ ແລະ ການຝຶກອົບຮົມ ໄລຍະສັ້ນ ເພື່ອຍົກລະດັບ ການຫັນເປັນດິຈິຕອນ ແລະ ການແກ້ໄຂບັນຫາຂອງທຸລະກິດ. ຜ່ານມາ IIC ໄດ້ລົງນາມໃນ MOU ດ້ານວິຊາການກັບ 4 ສະຖາບັນໃນປະເທດໄທ ເພື່ອການຄົ້ນຄວ້າ ແລະ ການຝຶກອົບຮົມຮ່ວມກັນໃນຫົວຂໍ້ຕ່າງໆທີ່ກ່ຽວຂ້ອງກັບ e-commerce ແລະ ການພັດທະນາຜູ້ປະກອບການ.