ພິທີມອບ-ຮັບ ໜ້າທີ່ຫົວໜ້າສະຖາບັນ, ຜູ້ເກົ່າ ແລະ ຫົວໜ້າສະຖາບັນ, ຜູ້ໃຫມ່ ໃນວັນທີ 21 ພະຈິກ 2023

ໃນວັນທີ 21 ພະຈິກ 2023 ທີ່ສະຖາບັນອຸດສາຫະກໍາ ແລະ ການຄ້າ, ກະຊວງອຸດສາຫະກຳ ແລະ ການຄ້າ ໄດ້ຈັດພິທີມອບ-ຮັບ ໜ້າທີ່ວຽກງານລັດຖະການ ລະຫວ່າງ ທ່ານ ປອ ແກ້ວມໍລະກົດ ສິດລາກອນ, ຫົວໜ້າສະຖາບັນ, ຜູ້ເກົ່າ ແລະ ທ່ານ ວຽງສະຫວ່າງ ທິບພະວົງ, ຫົວໜ້າສະຖາບັນ ອຄ, ຜູ້ໃຫມ່ ເພື່ອສືບຕໍ່ຊີນຳ-ນຳພາ ແລະ ຄຸ້ມຄອງ-ບໍລິຫານວຽກງານຂອງສະຖາບັນອຸດສາຫະກຳ ແລະ ການຄ້າ, ກະຊວງອຸດສາຫະກຳ ແລະ ການຄ້າ.

ພິທີມອບ-ຮັບໜ້າທີ່ຄັ້ງນີ້ ໄດ້ຈັດຂຶ້ນໂດຍການເຂົ້າຮ່ວມເປັນສັກຂີພິຍານ ຂອງ ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ແລະ ພະນັກງານ-ລັດຖະກອນຂອງສະຖາບັນ ອຸດສາຫະກໍາ ແລະ ການຄ້າ ແລະ ແຂກຖືກເຊີນຈາກບາງກົມອ້ອມຂ້າງກະຊວງອຸດສາຫະກຳ ແລະ ການຄ້າ.

ພ້ອມນີ້, ກໍ່ໄດ້ຊົມເຊີຍຜົນງານດີເດັ່ນທີ່ຍາດມາໄດ້ ຂອງທ່ານຫົວໜ້າ ສສອຄ ຜູ້ເກົ່າ ໃນການປະກອບສ່ວນວຽກງານຕະຫຼອດໄລຍະຜ່ານມາ ແລະ ໄດ້ໃຫ້ຄໍາໂອວາດ ແກ່ຮັກສາການແທນຫົວໜ້າສະຖາບັນ ໃຫ້ເອົາໃຈໃສ່ໃນການຊີ້ນຳນຳພາ, ມີຄວາມໜັກແໜ້ນຍົກສູງຄວາມເປັນແບບຢ່າງການນໍາພາທາງດ້ານການເມືອງ-ແນວຄິດ, ການຈັດຕັ້ງ, ຄຸນສົມບັດສິນທໍາປະຕິວັດ, ຕ້ານປະກົດການຫຍໍ້ທໍ້ຕ່າງໆ ເພີ່ມທະວີຄວາມສາມັກຄີພາຍໃນ ແລະ ພາຍນອກຢ່າງກວ້າງຂວາງດ້ວຍຄວາມຮັບຜິດຊອບສູງ ເພື່ອເຮັດສຳເລັດໜ້າທີ່ໃນວຽກງານທີ່ຖືກມອບໝາຍ.